بالفلسطيني المشربح ناب ترامب راح يغرسه في الاعراب
اذا في واحد من بين كلّ العرب، المُطبعين وإلّي هم في درب التطبيع، وحتى البعيدين عن هيك موّال، واحد بيعتقد انه ترامب، بعد ما نهب وسرق واستولى على تريليونات من خوابي دول الخليج، قد اصبح صديقا لهم، او لبعض العرب، فهذا هو الغشم بعينه، الغشيم غشيم وراح يبات على ضيم،
ترامب يا عمّي ما بيهمّه إلّا جيوبه ورضى اسرائيل والصهيونية العالمية عليه،
هوّ بيهوبر وبيتبجّح وبيتمجنن، لكن في دائرة مرسومة له، من القوّة الخفيّة، وما بيقدر يخرج من هذه الدائرة، مع انه مبسوط ووفي لهذه الدائرة،
أما العرب، الذين "كتّوا" التريليونات مثل الاوادم، فهم خارج أي دائرة اهتمام لترامب، اللهم إلا بمدى استعدادهم للدخول في "حظيرة نتنياهو"، وان "يماعو" كالخرفان والجديان، وليصل صراخهم إلى سماء العنان!!!،
كمان، الله هو العليم، يا جماعة الخير، انه نتنياهو، وبالتنسيق مع ترامب، راح يضرب ايران ضربة جامدة،
نتنياهو ما كاين لا يهضم ولا يبلع كل "هالهلمّة" يلي بتصير في عُمان وفي ايطاليا، من مفاوضات النووي،
لسان حال نتنياهو بيقول يا جماعة بانه، بلا مفاوضات بلا بطّيخ، النووي الايراني الجيّد هو النووي المُدمّر، وهوّ ساير في هالطريق، ويبدو انه ما راح يتراجع عن ضرب ايران، وخاصة انه استطاع يا جماعة قصقصة اجنحة حزب الله في لبنان، على شان هيك اصبحت طريق مقاتلاته إلى طهران سالكة وبدون مخاطرات كبيرة على جبهته الداخلية، وصواريخ ابو يمن مقدور عليها،
هلّا والله الواحد محتار شو راح يكون موقف هالعربان من ضربة ايران، هل سيزودوا سراجها بالزيت أم ماذا؟؟؟!!!،
طبعا العرب ولا في بالهم غزة، ولا انّه الاطفال بيموتوا من الجوع وهمّ بيموتوا من التخمة،
والله الواحد صار يتمنّى لو بدل هالدول العربية، ننقل بدالهم كولومبيا والبرازيل وبوليفيا والتشيلي، لان شعوب هذه الدول احنّ على الشعب الفلسطيني من ابناء جلدتهم، يلّي غيروا جلدهم ليتواءم مع رغبات نتنياهو وترامب.
